Abu Ali ibn Sino nomidagi viloyat axborot-kutubxona markazida “Kitobsevar millat” shiori ostida kitobxonlik haftaligining tantanali ochilish marosimi bo‘lib o‘tdi.Axborot-kutubxona markazi yig‘ingohida O‘zbekiston Yozuvchilar uyushmasi viloyat bo‘limi, viloyat axborot va ommaviy kommunikatsiyalar hududiy boshqarmasi, Respublika Ma’naviyat va ma’rifat markazi Buxoro shahri bo‘linmasi vakillari, BuxDU o‘qituvchilari, tyutorlari hamda talabalari, faol kitobxon yoshlar, kutubxona ahli yig‘ildi.
Tarixchi olim Kamol Rahmonovning jadidlarning kutubxonalar bunyod etilishi va kitoblarni asrash borasida ko‘rsatgan ma’naviy jasorati to‘g‘risidagi ma’ruzasi yig‘ilganlar uchun yangilik bo‘ldi.
Buxoro shahridagi 29-IDUM iqtidorli o‘quvchi-qizlaridan tarkib topgan raqs dastasining hamda BuxDU filologiya fakulteti talabalarining sahnaviy chiqishlari kitob va kitobxonlarga bo‘lgan ehtiromni o‘zida mujassam etdi.
Eslatib o‘tamiz, 26 aprel kuniga qadar davom etadigan haftalik doirasida kitobxonlar uchun turli-tuman tadbirlar, adabiy-musiqiy kechalar, davra suhbatlari, tanlovlar, kitob taqdimotlari, “Libmob” aksiyalar o‘tkazilishi rejalashtirilgan bo‘lib, viloyat aholisi hamda mehmonlarini ziyo maskanida kutib qolamiz.
